Haqqımızda
Bakımızın Şərqində yerləşən, gənclərin idmana və sağlam həyata təşviq edilməsində mühim mərkəzlərdən biri olan Azərbaycan Atıcılıq Mərkəzi 2015-ci il martın 9-da istifadəyə verilib. Mərkəz funksionallığı ilə seçilir. Belə ki, 80 idmançının eyni vaxtda yarışmasına şərait yaradan atış xətti, praktiki tədris-sınaq, kafe, VIP gözləmə və istirahət, dopinq yoxlama, silah saxlama zalları ilə mərkəzin ümumi sahəsi 123 min kvadratmetrdən artıqdır. Həm peşəkar, həm də əyləncə məqsədli atışlara imkan verən mərkəzimiz güllə atıcılığı sahəsində 10, 25, 50 və 300 metr məsafə üzrə yarışların keçirilməsi üçün şərait yaradılıb. Ərazidə 80-ə yaxın atıcının eyni zonada bacarıqlarını sınamağa fürsət yaradacaq qədər geniş ərazi təşkil olunub. Həmçinin 10 metrlik məsafəyə qapalı atış tirində də 80 idmançının eyni vaxtda yarışmasını təmin edən atış xətti quraşdırılıb. 300 metrlik məsafəyə yarımqapalı atış tirində də yarışların yüksək səviyyədə təşkili üçün hərtərəfli imkanlar var. Burada eyni vaxtda 40 idmançı gücünü sınaya bilər. Stend atıcılığı sahəsində 5 atış meydançası inşa edilib ki, bu meydançalarda səngər atış hərəkətləri üçün 75 hədəftullayıcı avadanlıq var. Dairəvi atış hərəkətləri üçün inşa edilmiş 5 qüllədə isə 10 hədəftullayıcı avadanlıq istifadədədir.
Atıcılıq Federasiyasının vəzifələrinə gəldikdə isə, hər il atıcılıq üzrə məşqçi heyətini və milli yığma komandanın heyətini müəyyən edən mərkəz həmçinin cari və perspektiv planı, xarici ölkələrə ezam edilən heyətin tərkibini və həmin nümayəndə heyəti rəhbərliyinin hesabatlarını təsdiq edir.
Atıcılıq üzrə ölkəmizi dünyanın müxtəlif ölkələrində təmsil edən idmançıların, məşqçilərin və digər mütəxəssislərin sosial müdafiəsini və maraqlarını təmin edən mərkəz həmçinin idman veteranlarına qayğı göstərməyi unutmur. Respublikada ölkədaxili və beynəlxalq miqyaslı yarışların keçirilməsini planlaşdırılmasını və təşkil edilməsinə xüsusi diqqət ayıran Atıcılıq Federasiyası atıcılıq üzrə mütəxəssislərin ixtisaslarının artırılmasında, idmanın kütləviləşdirilməsində və təbliğində iştirak edir.