Bizim atıcılıq mərkəzinin Avropanın ən böyük mərkəzi olduğunu bilirdinizmi?
Buranı sevəcəyinizə ona görə əminik ki, ziyarətçilərin və istifadəçilərin tam rahatlığı üçün düşünülmüş tikili müxtəlif funksional sahələrdən ibarətdir ki, bunun da ümumi sahəsi 123 min kvadrat metrdən artıq ərazini əhatə edir.
Həm peşəkar, həm də əyləncə məqsədli atışlara imkan verən mərkəzimiz güllə atıcılığı sahəsində 10, 25, 50 və 300 metr məsafə üzrə yarışların keçirilməsinə imkan verir. Ərazidə 80-ə yaxın atıcının eyni zonada bacarıqlarını sınamağa fürsət yaradacaq qədər geniş ərazi təşkil olunub. Həmçinin 10 metrlik məsafəyə qapalı atış tirində də 80 idmançının eyni vaxtda yarışmasını təmin edən atış xətti quraşdırılıb. 300 metrlik məsafəyə yarımqapalı atış tirində də yarışların yüksək səviyyədə təşkili üçün hərtərəfli imkanlar var. Burada eyni vaxtda 40 idmançı gücünü sınaya bilər. Stend atıcılığı sahəsində 5 atış meydançası inşa edilib ki, bu meydançalarda səngər atış hərəkətləri üçün 75 hədəftullayıcı avadanlıq var. Dairəvi atış hərəkətləri üçün inşa edilmiş 5 qüllədə isə 10 hədəftullayıcı avadanlıq istifadədədir.
Bundan əlavə, ziyarətçilərimizin asudə vaxtlarını dəyərləndirməsi üçün kafe və VIP gözləmə zalı da istifadədədir. Mərkəzin ərazisində həmçinin silah saxlama, 55 yerlik 2 konfrans və mətbuat zalları, tibb məntəqəsi, fitnes zalı var. Dörd mərtəbədən və terrasdan ibarət olan mehmanxana binası da mərkəzin ziyarətçilərinin xidmətindədir.